LAOAG CITY – Tallo iti kada 10 a Pilipino ti makapaspasar latta ti kinakurang iti taraon basar iti 2025 survey ti Department of Science and Technology–Food and Nutrition Research Institute (DOST-FNRI).
Rimmuar iti datos a 32.6% ti populasion ti food insecure, apagapaman a nababbaba iti 33% idi 2023.
Iti nasao a panagadal, 2.9% ti makapaspasar ti nakaro a kinakurang iti taraon wenno saan a mangmangan ti maysa nga aldaw wenno nasursurok pay.
Inbatad ni Department of Science and Technology Sec. Renato Solidum Jr. a masapul a papigsaen ti pagsapulan dagiti umili tapno makissayan ti food insecurity ken kinarigat iti panagbiag.
Naammoan nga agtigtignay payen ti presidential anti-poverty office ken dadduma pay nga opisina tapno masolbar daytoy a parikot iti kabiitan a panawen.
