LAOAG CITY – Naipaiman iti gobierno probinsial ti 380 a milyon a pisos a pondo para iti pannaipatakder ti Ilocos Norte Central Terminal Hub.
Inbatad ni Atty. Nikki Pilar, mangidadaulo ti Metro Ilocos Norte Council (MINC), inkarigatan ti opisina da a mai-download ti nasao a pondo manipod iti Department of Transportation (DOTr) sakbay a nagngudo ii tawen 2022 tapno marugianan a dagus ti proyekto.
Inbatad na nga iti agdama ket maipinpinal ti naan-anay a detalye ken plano para iti terminal/transport hub.
Ti nasao terminal/transport hub a maipatakder iti Brgy. 5, San Pedro ditoy ciudad ti Laoag ket nadisenyo kas maysa nga intermodal terminal nga addaan kadagiti multi-level platforms tapno mapalag-an ti traffic congestion kadagiti business districts ken mangipaay iti seamless interconnectivity dagiti nagduduma a wagas ti transportasyon kas kadagiti public utility jeepney, bus, taxi, van, ken tricycle.
Malaksid iti daytoy, agserbi pay ti terminal/transport hub kas transfer point para kadagiti commuters a sumrek ken rumuar ditoy probinsia.
