LAOAG CITY – Naarestar ti uppat a lallaki kalpasan a nagsusugal iti maysa a minatayan iti Barangay Tonoton iti ili ti Piddig.
Segun ken ni P/Maj. Joseph Bantullay, Hepe ti Piddig Municipal Police Station, dagiti suspek ket agtawen ti 58, balo, mannalon; agtawen ti 33, naasawaan, construction worker; agtawen ti 34, awanan asawa, construction worker ken agtawen ti 27, awanan asawa, mannalon nga agpapada dagitoy a residente iti ili ti Piddig idinto nga adda pay ti maysa a lalaki a nakalibas.
Inbatadna a nakumpiskar ti 38 a pedaso ti playing cards, 3,995 a pisos a mapapati a nausar a pusta dagiti suspek ken dadduma pay a banag a nausar iti panagsugal.
Inlawlawagna a natiliw dagiti suspek kalpasan a naaktuaran dagiti otoridad nga agay-ayam dagitoy ti Lucky 9.
Innayonna a mapilaan ti kaso dagiti suspek gapu iti panaglabsingda iti Presidential Decree 1602 wenno ti Anti-Illegal Gambling Law.
