LAOAG CITY – Nalmes ti maysa a mannalon a napan naki-reunion kadagiti pagayamna iti Padsan River iti Barangay Tonoton iti ili ti Piddig.
Ti biktima ket maysa a lalaki, agtawen ti 52, awanan asawa ken residente iti nasao met laeng a barangay.
Basar iti Piddig Municipal Police Station, nagtutulag ti biktima ken dagiti pagayamna a selebraran ti reunion-da nga agpapagayam iti Padsan River.
Iti imbestigasion, kabayatan nga agdidigos dagiti agpapagayam ket naobserbaranda a mapukpukaw ti biktima.
Nakita ti biktima iti karayan nga adda ti kauneg nga innem a kadapan a saanen nga agang-anges.
Naideklarar a dead on the spot ti biktima babaen ti attending physician a ni Dra. Maricon Martin ti Rural Health Unit Officer iti ili ti Piddig no sadinno ti rason ti pannakatay ti biktima ket Alcohol Intoxication secondary to drowning.
Kabayatanna, inpakaammo ti ina ti biktima a makapaspasar daytoy ti epilepsy.
