LAOAG CITY – Nakasagana a kasoan ti kriminal ti Department of the Interior and Local Government (DILG) ti uppat a retired generals a maipagarup a mangtultulong iti pugante a negosiante a ni Atong Ang.
Daytoy ti inrakurak ni Department of the Interior and Local Government Secretary Jonvic Remulla kalpasan a binallaaganna dagiti retirado nga opisial ti Philippine National Police (PNP) a maipagarup a tumultulong tapno ilemmeng ni Ang iti linteg.
Inbatadna a nabayagen nga adda ti access kadagiti otoridad ni Ang gapu ta dagiti bodyguards daytoy ket sipod pay idi 1988 agingga iti 2022.
Inlawlawagna nga im-imbestigaranen ti ahensia ti uppat a dati nga heneral ngem saanna nga innaganan basta kunana a dagitoy ket nasinged iti negosiante iti kangitingitan ti sabong ken e-sabong business operations a kaduana a mapan makipallot ken agkakadua a rumrummuar ken mangmangan.
Innayonna nga adda ti resources ti negosiante tapno gumatang ti armas ken mangala ti armado a bodyguards ngem adda ti patinggana a magatang ti kinapudno dagiti mangilemlemmeng kenkuana gapu ta adda met ti pamilia dagitoy.
