LAOAG CITY – Agtalinaed pay laeng iti ospital dagiti uppat iti pito nga estudiante a nasugatan iti napasamak nga insidente ti pammaltog iti Banga National High School idi Setiembre 18.
Segun ken ni Banga Mayor Albert Palencia, agtultuloy ti panang-monitor-da iti kasasaad dagiti biktima kabayatan nga agtultuloy ti panagsangpet ti tulong manipud kadagiti nagduduma nga ahensia ti gobierno para kadagiti estudiante ken iti pamiliada.
Mainaig iti daytoy, personal a bimmisita iti pagadalan ni Cabinet Secretary Benjamin “Benhur” Abalos Jr. tapno kumustaen dagiti biktima, no sadinno inpasana ti mensahe ken sigurado a suporta manipud ken ni Presidente Ferdinand Marcos Jr.
Inbatad ni Abalos ti pinaiget a regulasion iti panagusar ti social media dagiti agtutubo, pakairamanan ti panagbukel ti classification system para iti online content kas adda iti Movie and Television Review and Classification Board (MTRCB).
Nupay kasta, temporario a nangisayangkat ti modular classes iti Banga National High School kabayatan ti panangidaulo ti psychological ken psychosocial assessment para kadagiti na-trauma nga estudiante ken mangisursuro.
Inpasigurado met ti lokal a gobierno a makitinnulong iti local government unit, Parents-Teaches Association (PTA) ken school administration tapno urnosen ken patibkeren ti perimeter fence ti pagadalan kas paset ti panangpapigsa iti seguridad dagiti agad-adal.
