LAOAG CITY – Winaya-wayaanen ti Philippine National Police dagiti uppat nga indibidual a naarestar gapu iti illegal a panagsusugal da iti maysa a minatayan iti Barangay Baligat iti ciudad ti Batac.
Segun ken ni Police Lt. Col. Gerome Wangkey, ti chief of police iti ciudad ti Batac, kalpasan a naipila da ti kaso a panaglabsing ti Presidential Decree 1602 wenno illegal gambling kontra kadagiti suspek ket dagus da met a nakapagpiyansa.
Inlawlawag ni Wangkey a 30 ribo a pisos koma ti pagpiyansa iti tunggal maysa dagiti suspek ngem kiniddaw da ti pannakaipababa ti piyansa da, isut gapuna a nagbayad laeng dagitoy iti sag-10 ribo a pisos da.
Immuna iti daytoy, naarestar dagiti uppat a suspek nga agpapada nga addaan iti umno a tawen kalpasan a naaktwaran dagiti kameng ti pulisya ti panagay-ayam da ti “Lucky 9” iti maysa a minatayan.
Nakumpiskar dagiti otoridad iti lugar ti baraha, lamisaan, tugtugaw ken ti mapapati a pusta dagiti suspek nga umabot iti P745 a pisos.
