LAOAG CITY – Dumanon iti 40 a milyon a Pilipino ti awan ti nadalus a danum nga in-inumenda iti intero a pagilian.
Segun ken ni Department of Environment and Natural Resources Undersecretary Carlos Primo David, kaaduan kadagiti Pilipino ket mangal-ala ti inumenda a danum manipud iti ubbog ken danum manipod iti tudo.
Nupay addaanda ti dadakkel a proyekto para iti dadakkel a siudad kas ti Bacolod, Cebu, Cagayan de Oro ken Tarlac City ket pinatutukan ni Presidente Ferdinand Marcos Jr. ti 40 a milyon nga underserved population isu a mangisaysayangkatda dagiti estratehia tapno makaipaay ti nadalus a danum a mainum para kadagiti komunidad.
Kaaduan kadagiti komunidad nga awan ti nadalus a danum ket iti Bangsamoro Autonomous Region in Muslim Mindanao ken nupay adda ti 7,600 nga isla ti Pilipinas, adu pay laeng ti saan a makaammo nga adda ti 5,500 ditoy ket babassit nga isla ket kaaduan kadakuada ket mangngalap ken awan ti access iti nadalus a mainum a danum.
Maysa kadagiti estratehia para kadagiti small island barangays ket ti maikkanda ti danum a mainum iti babaen ti desalination process.
Ti desalination process ket conversion ti sea water iti fresh water ken ti main component daytoy ket desalination system nga addaan ti membrane filter wenno maibati amin ti apgad ket iruarna laeng ti fresh water.
Ti solusion ket para kadagiti residente nga adda iti upland ket ti pannakaipasdek ti imprastraktura tapno maaddaan ti nadalus a danum gapu ta kaaduan kadagiti residente ditoy ket agsaksakdo laeng kadagiti bubon.
Kabayatanna, adda ti 65 a barangay ti maipangpangruna a maikkan ti desalination machine ket adda ti P5 agingga P8 milyon ti maysa nga yunit ti desalination machine.
