LAOAG CITY – Binabalaw ti Malacañang iti rakurak ni Vice President Sara Duterte mainaig iti salun-at ni Presidente Ferdinand Marcos Jr.
Daytoy ket kalpasan a dinakamat ni Vice President Sara ti “good luck” idi saludsoden isuna no ania ti mensahena ken ni Presidente Marcos iti baet ti maipagarup nga isyu iti salun-at daytoy.
Iti press briefing iti Palasyo, inbatad ni Presidential Communications Office Undersecretary Claire Castro a maibilang daytoy nga iresponsable manipud iti saludsod ken sungbat.
Naglikudan ti Malacañang dagiti fake news a nagwaras no sadinno nga Artificial Intelligence laeng ti panagatendar ni Presidente Marcos Jr. iti panangselebrar ti Araw ng Kagitingan idiay Bataan.
Kabayatanna, mangiwayat ti Presidential Communications Office ti website a mabalin nga ag-report ti netizens ti makitada a fake news.
Gagem a mapagsungbat dagiti responsable iti panagiwaras kadagiti palso a damag ken sumango iti maiyannatop a kaso.
