LAOAG CITY – Inrakurak ti Department of Health nga adda ti sumurok 43,000 dengue cases a nairekord iti intero a pagilian agingga idi Pebrero 15.
Basar iti Department of Health, ti pakabuklan a bilang ti kaso ti dengue sipod idi Enero agingga idi Pebrero 15, 2025 sakbay pay ti panawen ti panagtutudo ket dumanonen iti 43,732.
Inbatad ti Department of Health, daytoy ket 56% a panagngato manipud iti 27,995 a kaso a nairekord iti kapada a panawen iti napalabas a tawen.
Nupay kasta, naobserbaran ti lima a porsiento a panagginad ti trend dagiti kaso iti napalabas nga uppat a lawas.
Malaksid iti daytoy, ti case fatality rate ket bimmaba iti 0.42 percent iti napalabas a tawen iti 0.38 percent ita a tawen.
Kuna ti Department of Health a ti nangato a bilang ket kaaduan a naduktalan iti tallo a rehion a nangitunda ti sumurok iti kagudua a kaso iti intero a pagilian.
Naammoan a ti Calabarzon (Cavite, Laguna, Batangas, Rizal, and Quezon) ket nakairekord ti 9,111 a kaso; adda met ti 7,551 a kaso iti National Capital Region; ken Central Luzon nga addaan ti 7,362 a kaso.
Innayon ti Department of Health a 17 a Local Government Units manipud kadagiti nasao a rehion ket naideklara a dengue hotspots.
