LAOAG CITY – Manamnama a maipila ti maikapat a reklamo nga impeachment ni Vice President Sara Duterte iti maikadua a lawas ti Enero inton tawen 2025 iti panangsubli manen ti sesyon ti Kongreso kalpasan ti bakasion iti paskua.
Segun ken ni House Deputy Minority Leader France Castro, dagiti tallo nga impeachment nga inpila kontra ken ni Vice Pres. Sara ket maisubmitir pay laeng iti House Committee on Justice ken posible nga iyur-uray pay laeng ni House Secretary General Reginald Velasco ti maikapat nga impeachment kontra iti maikadua a kangatoan a lider ti pagilian.
Ti Kongreso ket naikeddeng nga agsubli iti sesyon inton Enero 14 inton 2025 a mabalin a maipila ti maikapat nga impeachment kontra ken ni Vice Pres. Sara maipanggep iti maipagarup a saan nga umiso a panagusar ti confidential fund ti Office of the Vice President (OVP) ken ti Department of Education (DepEd) iti panawen a panagserbina a dumanon iti P612.5 milyon sipod idi maudi a paset ti 2022 ken maikatlo a quarter ti 2023.
Nadakamat a saan pay nga insubmitir ni Velasco iti opisina ni Speaker Ferdinand Romualdez ti maikapat nga impeachment isu a manarimaan pay laeng ti panangrebyu ti House Legal Department ti merito kadagiti nasao a kaso.
Iti babaen ti linteg, ingkapilitan daytoy nga isubmitir ti House Secretary General ti impeachment iti opisina ti House Speaker iti uneg ti 10 nga aldaw ti sesyon apaman a maawatna ken nasken a mairaman iti “Order of Business.”
Maipalagip a sumangsango iti nakaro a kontrobersial ni Vice Pres. Sara gapu iti rinibu a pineke a resibo nga insubmitirna iti Commission on Audit (COA) tapno mausar ti confidential funds pakairamanan ti Mary Grace Piattos a napaneknekan nga awan ti rekord daytoy iti Philippine Statistics Authority (PSA).
