LAOAG CITY – Manarimaan ti pannakaisagana dagiti nayun pay a kaso a maipila mainaig iti flood control anomaly.
Iti maysa nga interview, inrakurak ni Ombudsman Jesus Crispin Remulla nga adda ti nakalinya pay a lima agingga iti innem a kaso a sumruno nga ipila da iti uneg ti dua a lawas.
Nupay kasta, saanen a nangipaay ti nayun a detalye ti Ombudsman mainaig iti daytoy a banag.
Kinumpirmaran met ti Ombudsman a ni dati nga House Speaker Martin Romualdez ti madakdakamat nga agpanpanday linteg a naiyisoan ti freeze order.
Maipalagip nga idi biernes ket inrakurak ti Anti-Money Laundering Council (AMLC) a nakaala daytoy ti freeze order manipod iti Court of Appeals (CA) iti assets ti maysa a saanen a nainaganan nga agpanpanday linteg a maipagarop a karaman iti flood control corruption scandal.
Sakopen ti freeze order ti korte ti 25 bank accounts ti agpanpanday linteg ken ti 10 nga insurance policies a nakarehistro iti babaen ti nagan na.
Ti nasao a freeze order ket paset ti agtultuloy nga imbestigasyon kadagiti karaman iti maanomalya a flood control projects ti gobierno.
Kabayatanna, inrakurak ti Ombudsman a ti agdma a kaso ket maipadpadalan iti preliminary investigation ken maob-obserbaran ditoy ti due process gapu ta ti kalaban da ket manipod iti gobyerno nga addaan ti ado a kwarta ken nabileg.
