LAOAG CITY – Inpakaammo ni Bombo International News Correspondent Henry Afaga manipud idiay Pennsylvania, United States of America nga adda ti lima nga estado a naiget a mangipaay ti suporta ken ni Vice President Kamala Harris para iti panagpaidasigna iti kina-Presidente iti Estados Unidos.
Daytoy ket kalpasan a pormalen nga insanud ni United States Presidente Joe Biden ti kandidaturana iti kina-Presidente iti nasao a pagilian.
Segun ken ni Afaga, basar iti obserbasionna ket naiget ti makitkitana a suporta dagiti lima nga estado ti Amerika kas ti North Carolina, Pennsylvania, California, New York ken Illinois para iti Democratic nominee.
Inbatadna a napigsa ti suporta para ken ni Vice President Harris gapu ta inkari dagiti sumagmamano a Governor ti suportada kenkuana kas ti North Carolina ken Pennsylvania no sadinno dadakkel ti electoral votes dagitoy.
Mainaig iti daytoy, kuna ni Afaga nga awan pay ti pormal a pannakairakurak no asino ti agbalin nga official candidate para iti Democratic party.
Innayonna nga iti agdama ket umad-adu ti mangipakpakita ti suporta ken ni Vice President Harris para iti panagpailayonna iti kangatoan a posision iti kabilegan a pagilian iti intero a lubong.
