LAOAG CITY – Napilaan ti kaso gapu iti panaglabsing iti Presidential Decree 1602 wenno Illegal Gambling Law dagiti lima nga indibidual a natiliw iti Barangay Poblacion iti ili ti Burgos.
Inbatad ni Police Captain Jennie Lingan, ti Hepe ti Philippine National Police nga adda ti naawatda a report maipapan iti maisaysayangkat nga iligal a panagsusugal iti maysa a pagtaengan ti nasao a lugar.
Gapu iti daytoy, kunana a napanda dagus nagresponde a nagresulta iti panagballaigi iti pannakaarestar dagiti lima a suspek.
Innayonna a nakumpiskar kadagiti indibidual ti gambling paraphernalia kas ti baraha pakairamanan ti pusta nga aggatad ti 520 a pisos kabayatan ti panagay-ayamda ti break game.
