LAOAG CITY – Nakasaganan ti legal defense ni dati a Presidente Rodrigo Duterte para iti confirmation of charges hearing iti International Criminal Court a naikeddeng a rugian inton Septiembre 23, 2025.
Basar iti dokumento nga insubmitir iti Pre-Trial Chamber I idi Agosto 22, inrakurak ni Nicholas Kaufman a mangiyalokarda ti sag-30 a minuto para iti opening ken closing statements idinto a tallo agingga iti uppat nga oras met para iti oral presentation ti depensa.
Ti panagdengngeg ket paset ti proseso tapno makita no adda ti umdas nga ebidensia tapno ituloy ti maysa a panangtingiting kontra ken ni Duterte mainaig kadagiti alegasion ti crimes against humanity nga adda ti pakainaiganna iti kontrobersial a kampania kontra iti droga.
Basar kadagiti report, sumurok pito a ribu nga indibidual ti napapatay kadagiti operasion manipud idi 2016 agingga iti 2019 ngem mapattapatta a posible a dumanon iti 30 a ribu ti aktual a bilang basar kadagiti human rights groups.
Inpetteng ni Kaufman a saan a nangaramid ti aniaman a krimen ni Duterte ken nagserbi laeng iti pagilian a napudno iti las-ud ti naunday a panawen.
Namnamaen ti kampo ti dati a Presidente a tutukan ti depensa dagiti legal nga argumento mainaig iti jurisdiction ti International Criminal Court ti panagbalin a “politically motivated” ti kaso ken ti kinaawan iti direkta a pakainaigan ni Duterte kadagiti panangpapatay.
Maipalagip a naarestar ni Duterte babaen kadagiti otoridad ti Pilipinas idi Marso 11, 2025 basar iti warrant of arrest nga inparuk-at ti International Criminal Court nga agdama a nakabalud iti Scheveningen Prison idiay The Hague.
Kabayatanna, adda ti sumurok 300 a biktima ti kampania kontra iti droga ti nangisubmitir ti aplikasion tapno makipagpaset iti pre-trial proceedings.
