LAOAG CITY – Agdagup iti 50 a milyon a pisos ti tinawen a mailat-latang a pondo kadagiti bakante a permanente a posisyon iti lokal a gobierno ditoy ciudad ti Laoag.
Segun ken ni Vice Mayor Carlos Fariñas, 143 dagiti bakente a posisyon, 46 ditoy ket manipud iti Laoag City General Hospital, ken tig-16 iti Engineering Office, Treasury Office ken City Health Office.
Daytoy ti rason no apay a nangipasa da ti resolusyon iti biang ti Sang. Panlungsod a manggutigut ken Mayor Michael Marcos Keon a litupan na dagiti bakante a posisyon.
Kunana a no saan a malitupan dagitoy a posisyon ket napinpintas laengan no maiyalokar iti sabali ti nasao a pondo.
Innayon pay ti Bise Mayor a dagiti bakante a posisyon ket napintas pay nga oportunidad kadagiti overseas Filipino workers tapno saandan a maiyadayu kadagiti pamilya da.
