LAOAG CITY – Inpakaammo ni Bombo International News Correspondent Isidro Madamba manipud idiay California, USA nga adda ti agarup 60% a residente iti Estados Unidos ti saan a pabor iti panangatake ti Amerika iti Iran.
Segun kenkuana, daytoy ket kalpasan nga umad-adu ti bilang dagiti mairekrekord a matmatay gapu iti rinnupak nga addan ti pakabuklan a 3,730 nga indibidual no sadinno a kadagupan iti nasao a bilang, 1,406 a sibilian ti natay idiay Iran ken 200 ditoy ket ubbing, 1,029 idiay Lebanon, 60 idiay Iraq, 15 idiay Israel, 13 idiay Estados Unidos, 7 iti United Arab Emirates, 7 idiay Qatar, 6 idiay Kuwait, 4 Syria, 2 idiay Oman, 2 idiay Bahrain ken 1 idiay France.
Inbatadna a ti maysa kadagiti rason no apay a napasamak ti gubat ket mabuteng ti Amerika iti panagusar ti Iran kadagiti nuclear weapons ken ballistic missiles daytoy.
Inlawlawagna a naruay dagiti mabutbuteng kalpasan a nangiparuk-at ti naiget a pangta ni United States President Donald Trump kontra iti Iran no sadinno nga inikkanna laeng ti Tehran ti dua nga aldaw tapno lukatan manen ti Strait of Hormuz gapu ta no saan ket maminpinsan a dadaelen ti Amerika dagiti plantada ti kuriente.
Innayonna a saan met latta nga agpangadua ti Iran a bumales iti Estados Unidos babaen iti panangiwayatda kadagiti nagduduma a klase ti armas ken pagpabettak.
