LAOAG CITY – Inrakurak ni President Ferdinand “Bongbong” Marcos Jr. a pito kadagiti 16 nga indibidual a karaman kadagiti maanomalya a flood control projects ket adda dan iti kustodyar dagiti otoridad.
Segun ken ni Presidente Marcos, maysa ti inarestar dagiti kameng ti National Bureau of Investigastion idinto nga innem dagiti boluntaryo a simmuko iti Criminal Investigation and Detection Group.
Inbatad ti presidente nga adda pay ti dua nga indibidual a plano na ti sumuko ken manarimaan ti pannakikoordinar da iti PNP-CIDG.
Nagballaag ni Presidente kadagiti tumultulong a mangilemlemmeng kadagiti dadduma pay a naiyisoan ti arrest warrants nga adda met ti sungsungbatan da iti linteg.
Mainaig iti daytoy, ginutigot ni Marcos dagiti dadduma pay a karaman iti maanomalya a flood control projects a sumukon ken sangwen dagiti naipila a kaso kontra kadakuada.
Inpasingked ti presidente nga awan ti maipaayan ti special treatment kadagiti karaman iti flood control anomaly.
