LAOAG CITY – Kinumpirmaran ni Migrant Workers Secretary Hans Leo Cacdac nga addan iti stable a kondision ti 7 a tripulante a Pilipino a nasugatan iti drone attack ti Iran idi Mayo 5 iti container ship a CMA CGM San Antonio kabayatan a dumaldalyasat iti Strait of Hormuz.
Inbatad ni Cacdac a dua iti Pinoy seafarers ket manamnama a makaawiden ditoy Pilipinas kadagiti sumarsaruno nga aldaw idinto a ti lima a dadduma pay a Pinoy crew ket nagtalinaed a naka-confine ken agpapaimbag iti maysa nga ospital idiay Oman.
Inlawlawagna a tulungan ti gobierno ti pamilia ti sumagmamano kadagiti tripulante tapno makapan idiay Oman ken personal a mabisita dagiti ay-ayatenda iti biag a Pinoy crew kabayatan nga agpapaimbag dagitoy.
Agtultuloy ti pannakikoordinarda kadagiti maseknan nga ahensia ti gobierno pakairamanan iti shipping company ken manning agency tapno masigurado ti kasasaad ken alisto nga assistance para kadagiti naapektaran a Pinoy seafarers.
