LAOAG CITY – Maitantan ti panaglukat ti klase ti 738 a public schools kadagiti uppat a rehion iti pagilian inton Hulyo 29 gapu iti intunda ti Habagat ken Bagyo Carina, maibasar iti Department of Education (DepEd).
Inrakurak ni Department of Education Secretary Sonny Angara a saanna a piliten nga aglukat ti klase dagiti naapektaran a pagadalan.
Iti post-na iti X, dinakamatna ti datos manipud iti Second Congressional Commission on Education (EDCOM 2) a mangipakpakita a dagiti agad-adal ket na-miss ti agarup 53 nga aldaw ti panangisuro manipud iti 180 nga aldaw gapu metten iti weather-related events.
Iti datos manipud iti Disaster Risk Reduction and Management Service ti Department of Education, dumanon iti 246 a pagadalan ti nalayus iti iduduprak ti bagyo ken ti habagat idinto a saan a bumaba iti 64 a pagadalan ti manarimaan a maus-usar kas evacuation center.
Immunan nga inrakurak ni Angara a kabayatan a dagiti dadduma a pagadalan ket masapolda nga itantan ti panangrugi ti klase tapno malpas ti panagdalus ket saan nga agideklara isuna ti postponement kadagiti klase tapno mapalubusan dagiti pagadalan nga addaan ti minimal agingga zero a nadadael nga ituloy kas iti naituding a petsa.
Naammoan nga idi Hulio 25, dumanon iti 90 a pagadalan ti nadadael a kasapulan ti agingga P630 a milyon para iti pannakatarimaanna.
Immunan nga inbatad ni Pres. Ferdinand Marcos Jr. a no mabalbalin ket masapol nga ituloy ti panaglukat ti klase inton Hulio 29 nupay ammona nga adda dagiti klasrum a saanen a mausar.
Iti baet daytoy, inpakaammo ti Presidente nga ipabus-oyna kadagiti mangidadaulo kadagiti pagadalan ti agdesision no ituloy ti klase inton Lunes.
