LAOAG CITY – Natalged ti 81 a Pinoy seafarers a dimmalyasat iti Strait of Hormuz.
Basar iti Department of Foreign Affairs (DFA), dagiti nasao a 81 a Pinoy seafarers ket nakalugan iti uppat a barko.
Naammoan a dagiti barko ket pakairamanan ti MV Western Doncaster, MV Vivian Trader, MV Lyng Trader ken MV Eva Fuji ket nakumpleto ti panaglayagda iti nasao a lugar iti nagbaetan ti Hunio 24 agingga Hulio 1.
Ti nasao a rakurak ket kagiddan ti naminsan manen a rinnupak iti nagbaetan ti Estados Unidos ken Iran.
Nagyaman ti Department of Foreign Affairs ti papel ti United Nations ken International Martime Organization (IMO) iti panangsuporta kadagiti civilian shipping ken panangasikaso ti pannakaibakwit kadagiti seafarers a naapektaran iti riribok.
Iti nasao a panagtitinnulong ti United Nations ken International Martime Organization ket nakaibakwitdan ti 136 a barko ken 2,900 a seafarers.
