LAOAG CITY – Kinumpirmaran dagiti otoridad a saan a bumaba iti 82 nga indibidual dagiti natay kalpasan ti gas explosion iti maysa a coal mine iti Shanxi province idiay China.
Napasamak ti aksidente iti Liushenyu coal mine iti Changzhi city.
Iti kaudian a briefing dagiti opisial, kinumpirmaran dagitoy a 82 ti natay, sumurok 120 ti naitaray iti ospital ken dua ti agtultuloy pay a mabirbirok.
Inladawan dagiti otoridad a “chaotic” ti situasion kalpasan ti panagbettak kabayatan nga agtultuloy ti imbestigasion iti namunganayan ti insidente.
Basar kadagiti opisial, adda ti naduktalan a “serious violations” iti operasion ti panagmina ngem saan pay a naiparuk-at ti kumpleto a detalye mainaig kadagiti panaglabsing.
Rinibribu a rescuers ken medical personnel met ti insigida a naipatulod iti lugar tapno tumulong iti search and rescue operations.
Naruay kadagiti nasugatan ket naapektaran ti makasabidong a gas.
