(Update ) LAOAG CITY – Manamnama a mapilaan ti kaso kriminal ti suspek iti napasamak a pammagkong iti Sitio Pamalian, Barangay 57-Pila ditoy ciudad ti Laoag a nakatayan ni Vincent Bautista Mangaoang ken nakasugatan ti kabsat na a ni Klein Bautista Mangaoang.
Immuna ti daytoy, timmawag iti PNP ti agnagan iti Agnes Rodriguez a taga Barangay 2 ditoy ciudad ti Laoag ken inpakaammo na nga adda iti balay da ti suspek ti pammagkong a ni Jenesor Tamayo.
Insigida a napan dagiti kameng ti pulisya iti lugar kadwa da ni Klein Mangaoang ket positibo nga intudo na ti suspek a nangbagkong kadakuada iti pimmusay a kabsat na.
Iti agdama, nagtalinaed ti suspek iti kustodyar iti PNP-Laoag ken manamnama a mapilaan ti kaso nga homicide ken frustrated murder.
Maipalagip a bayat ti panagin-inom ti suspek ken ti ama da a ni Vicente Mangaoang ket adda ti saanda a nagkinnaawatan.
Gapu ti daytoy, nakiballaet dagiti annak na a nagresultan ti napasamak a pammagkong a nakatayan ni Vincent Mangaoang.
