LAOAG CITY – Ibilang ni P/C/Insp. Rodelio Santos, Chief of Police ti ciudad ti Batac a napintas kenkuana ti resulta ti pannakaayab da kadua na dagiti innem a sabsabali pay nga Hepe ti Pulisya ditoy probinsiya.
Segun ken ni Santos, napintas gapu ta nailawlawag na kadagiti opisyal ti PNP iti Region 1, no ania dagiti nagapuanan da iti las-od ti makalawas manipud Nov. 3 agingga iti Nov. 10.
Kas koma iti kaadda dagiti napasuko da a drug personality, nakapaisurender da iti awan lisensiya na a paltog ken nakatiliw da kadagiti nagsalungasing kadagiti nagduduma nga ordinansa iti nasao a ciudad.
Kuna na, kas resulta iti palawag na ket naawatan dagiti opisyales ti PNP iti nasao a region.
Innayon ni Santos a saan na nga ammo no ania ti nagbalin a gasat dagiti kakadua na a Chief of Police a napaayaban nga agreport iti Regional Office ti PNP.
