LAOAG CITY – Adda iti kritikar a kondisyon ti maysa a balasitang kalpasan a napaltugan kalpasan a naganawa iti riri ti ama na ken iti uliteg na idiay ili ti Pagudpud.
Binigbig ni P/S/Insp. Eduardo Santos baro nga Hepe ti Pulisya ti nasao nga ili, idi pay laeng rabii a nagriri dagiti agkabsat a da Ronelio Gonzales agtawen ti 55 ken Rizal Gonzalez agtawen ti 44, agpada a naasawaan ket residente iti Bgy. Baduang iti nasao nga ili gapu iti sanikua kas iti daga.
Kuna na nga itay bigat ket intuloy da ti nagriri rason a naganawa ti agnagan ti Marinel Gonzales agtawen ti 10, anak ni Rizal ket maipagarup a bimmunot ti paltog ni Ronelio ket pinaltugan na ti kabsat na ngem ti natamaan ket ti balasitang.
Naitaray nga insigida ti biktima iti Mariano Marcos Memorial Hospital and Medical Center idiay ciudad ti Batac.
Rumrumwar a natamaan ti buksit ti biktima , ken nanartaros a nakatamaan pay ti ima na.
Naglibas met ti suspek kalpasan ti insidente imet na ti paltog nga inusar na iti nasao a krimen a maysa a kalibre 45 basar iti narekubre a kapsula iti nasao a krimen.
Iti agdama ket birbiruken dagiti pulis ti suspek.
