LAOAG CITY – Nagpalagip ti Land Transportation Office (LTO) ditoy ciudad ti laoag kadagiti agpalplano nga agi-renew wenno mangala ti lisensiya da nga agmaneho.
Daytoy ket mainaig iti baro a pagalagadan iti panagala ti lisensiya wenno agi-renew.
Segun ken ni Mr. Hipolito Arde, mangidadaulo ti LTO-Laoag, mangrugi inton Enero 8 ket “on line” ton ti wagas a panagala ti medical certificate kadagiti agirenew wenno mangala ti lisensiya da.
Kuna na a dagitinto laeng binigbig ti LTO a kilinika wenno doctors ti mapalubusan nga agited ti medical certificate ken awan sabalin.
Inlawlawag ni Arde a babaen iti daytoy ket mapaalisto ti serbisyo gapu ta saanen a kasapulan ti papel.
Iti agdama ket awan pay ti na-accredit a klinika wenno doktors tapno agited ti medical certificate ngem adda dan dagiti nagaplikar para iti accreditation dagitoy.
