LAOAG CITY – Inlawlawag ni Dr. Allan Taylan no ania ti sakit nga Autistic Disorder wenno Autism.
Segun kenni Dr. Taylan, nagduduma ti karakter ti maysa a tao nga addaan iti sakit nga autism ken mangrugi a maobserbaran no daytoy ket addaan ti nasao a sakit mangrugi iti tawen na a tallo.
Nupay kasta, kuna na a dagiti ubbing a maibilang nga autism ket nagduduma ti pagsiriban da kas iti panagdrawing, panagdenggeg, panagraman ken panagangot.
Kunana a dagitoy a kapabilidad dagiti autism patients ket nasken a maaprisyar tapno agbalin da a nasinged ti pada da a tao.
Inbatad na a ti nasao a sakit ket mabalin a matawid ngem adda met dagiti dadduma a possible a gapu ti saan a maiparbeng nga ar-aramiden wenno ipapauneg ti maysa nga ina bayat iti panagsikog na.
Inbalakad ni Taylan kadagiti nagannak a no adda ti anak da nga agsagsagaba ti autism ket kasapolan ti naan-anay a panaganus ken ipateg ti anak gapu ta saanna a nagayatan ti sitwasyon na.
