LAOAG CITY – Maisayangkat iti masungad a Marso kinse iti agdama a tawen ti “water summit” iti Ilocos Norte Centennial Arena.
Inbunannag ni Mr. Edwin Cariño, mangidadaulo ti Sustainable Development Center wenno SDC a paset daytoy iti kalikagum ni Gob. Imee Marcos a masapa a panagsagana ti probinsia iti iyaasidegen ti panawen ti kalgaw a masansan a panagprobproblema iti kinakirang ti danum.
Inlawlawagna a manamnama a matratar iti maisayangkat a workshop no ania ti pakaseknan dagiti mannalon ken no ania met ti mabalin nga itulong dagiti nadumaduma nga ahensia tapno masolusyonan ti nasao a problema.
Segun kenkuana, manamnama nga atendaran daytoy ti 250 a tattao manipud iti nadumaduma a sector.
Imbatad ni Cariño a maibilang ditoy dagiti estudiante manipud iti environment, agriculture, agricultural engineering, mangisursuro ken dagiti maseknan nga ahensia nga adda pakainaigan ti danum kas iti National Irrigation Administration, Philrice ken dadduma pay nga ahensia nga adda pakainaigan ti agrikultura.
Nupay kasta, kunana a kangrunaan ditoy dagiti lider dagiti mannalon, kameng ti sanjera, communal irrigation system, river irrigation system ken dagiti water organizations nga as-asistiran ti Bureau of Soil and Water Management wenno BSWM.
Innayonna a dandani limapulo a porsiento dagiti partisipantes iti nasao a taripnong iti mannalon.
