LAOAG CITY – Inbatad ni Hon. Ryan John Pascua, Presidente ti Liga ng mga Barangay (LnB) Ilocos Norte Chapter, a maysa kadagiti kangrunaan a problema dagiti barangay ket ti panangimanihir kadagiti basura.
Gapu iti daytoy, kuna na nga agtultuloy ti “Palit Basura Program” da tapno makatulong kadagiti barangay iti panangurnos ken panangimanihir iti basura.
Ti Palit Basura Program ket manggutigot kadagiti residente a mangurnong ken pagsisinaen da dagiti recyclable materials manipud kadagiti pagtaengan ken komunidad tapno maisukat dagitoy iti kuarta, produkto ken dadduma pay.
Segun kenkuana, adda dagiti uppat a barangay a nangadaptar iti nasao a programa manipod iti ili ti Pinili, Pasuquin, Poblacion iti Burgos, ken barangay ditoy siudad ti Laoag.
Agtultuloy met ti pannakikoordinar ti Liga ng mga Barangay iti Provincial Environment and Natural Resources Office (PENRO) ken dagiti dadduma pay a barangay a mangayat a mangadaptar iti programa.
Kalikagom ti Liga ng mga Barangay a mapalawa ti Palit Basura Program kadagiti ad-adu a barangay ditoy probinsia.
Namnamaen ni Pascua nga iti uneg ti dua a tawen, maabot ti target da a 70 a porsiento dagiti barangay iti Ilocos Norte a mangipatungpal iti nasao a programa.
