LAOAG CITY – Nagpanawagan ti environmental group a BAN Toxics para iti naig-iget a panangipatungpal ti Republic Act 9003 wenno Ecological Solid Waste Management Act kagiddan ti panagadu ti basura manipud iti Manila Bay nga agturong kadagiti waterways idiay Parañaque City.
Segun iti grupo, inpakita ti insidente ti problema iti saan nga husto a panagibelleng ti basura, kinakurang iti waste management infrastructure ken nababa nga ammo ti publiko maipanggep iti umo a panagibelleng.
Basar iti Compendium of Philippine Environmental Statistics 2025, adda laeng ti sumrok 20,458 a materials recovery facilities ti pagilian maidasig iti sumurok 42,000 a barangay.
Inpetteng ti grupo a panawenen tapno papigsaen ti gobierno ken dagiti lokal a gobierno ti ammo ti publiko mainaig iti umno a panagibelleng ken panangisinasina kadagiti basura.
Nagpanawagan pay ti environmental group nga aramiden a pase ti formal waste management system dagiti informal waste workers ken maipaayanda ti social ken health benefits, training ken nataltalged a kondision para iti panagtrabaho.
Maipalagip a nagbalin a viral ita a lawas ti Redemptorist Water Channel iti Baclaran River kalpasan a timmaud ti naruay a basura kalpasan ti napipigsa a tudo idiay Metro Manila.
