LAOAG CITY – Kinumpirmaran ni Sangguniang Bayan Member Sherwin Tamayo iti ili ti Marcos iti naipadanun ditoy Bombo Radyo nga alegasyon ti Municipal Engineer a ni Engr. Warner Macusi a dumawdawat ni Bise Mayor Hilario Lorenzo iti lima a porsyento manipud ti kadagupan a balur dagiti maiyemplementar a proyekto iti nasao nga ili.
Inbatad na a naamuan na daytoy nga alegasyon bayat ti panagtataripnong da panggep dagiti proyekto iti napalabas a lawas ken nangegan amin dagiti department heads ti nasao nga alegasyon.
Indasar ni Tamayo ti alegasyon iti regular session idi kalman(Lunes) babaen ti previlage speech.
Segun kenni Tamayo, inimbitaran da ni Macusi iti maangay nga special session agraman ti bise mayor tapno malawlawagan ti alegasyon.
Inbunannag na nga imbestigaren ti committee as a whole ti nasao nga alegasyon gapu ta kayat da amin a maamwan ti kinapudno ti akusasyon.
Kabayatanna, inbutaktak ni Tamayo a naulit a naidasar ti alegasyon iti meeting idi kalman(Lunes) gapu ta kinumprontar ni Bise Mayor Lorenzo ti municipal engineer.
