LAOAG CITY – Nabuak dagiti empleyado ti maysa a paglakuan ti lugan iti Kalihi Area, Hawaii kalpasan ti napasamak a pammaltog.
Iti nakalap nga impormasyon ni Bombo International Correspondent Manny Pascua, napalaos ti panagbuteng ken nabuak dagiti Pilipino wenno Ilokano a manarimaan nga agtrab-trabaho iti paglakuan ti lugan iti Kalihi kalpasan a napaltogan dagiti otoridad ti maysa kadagiti suspek ti panagholdap.
Kuna na a naburburak dagiti sumagmamano a sarming ti nasao a paglakuan ti lugan kalpasan ti pammaltog.
Inlawlawag ni Pascua a maipagarup a nangholdap dagiti dua a saan a nabigbig a lallaki iti maysa a dakkel a pasdek negosyo idiay Pearl City idi ta kinamkamat dagiti otoridad agingga a nakadanun da iti paglauan ti lugan iti Kalihi.
Naamuan ni Pascua a ti maysa kadagiti suspek a napaltogan ket mapatta-patta nga agtawen ti 30.
Naitaray ti napaltogan a suspek iti Queens City Medical Center ngem naideklara a natay sakbay a naisangpet iti ospital.
Kabayatanna, nakasarasarita ni Pascua ti kabsat ti bookeeper nga agpapaay iti paglakuan ti lugan a napalaos ti panagbuteng na kalpasan a nakita na ti pannakapaltog ti maysa kadagiti suspek.
Naamuan ni Pascua nga insingasing dagiti top official iti Honolulu a no saan nga agparbeng dagiti mapaspasamak a krimen iti nasao a lugar ket aramaten da ti US Secret Service.
