LAOAG CITY – Maalarma metten dagiti Filipino idiay Canada gapu ti panagwaras ti corona virus ken kalpasan nga adda dagiti sumagmamano a naapektaran ti nasao a virus iti nasao a pagilian.
Segun kenni Mr. Joseph Agullana, OFW idiay Ontario, Canada ken tubo ditoy siudad ti Laoag, bimmassit dagiti agpaspasyar a tattao kadagiti kangrunaan a pagpasyaran iti nasao a lugar.
Kuna na mabuteng dagiti pada na a Pilipino iti pagilian da agraman dagiti Canadians gapu ti pangta ti virus iti salun-at da.
Inbatad ni Agullana nga adaywan da dagiti makita da a chinese iti nasao a lugar.
Innayon pay ni Agullana a pinaigetan ti gobyerno ti Canada ti pananginspeksiyon kadagiti pasahero nangruna dagiti gapu idiay China.
Iti mainaig a damag, inbunannag ni Mr. Joseph Agullana nga adda dagiti maawat da nga impormasyon seknan iti iseserrek ti corona virus.
Aw-awagan da daytoy ti Amber Alert a maawat amin dagiti nakarehistro ti cellphone na kadagiti network iti nasao a pagilian.
Mainaig iti daytoy, awan pay ti naimaldit a kaso ti corona virus idiay Toronto ngem naiget latta iti panagan-annad da ken agusar da kadgiti face mask.
Inalay-ayan na dagiti kaprobinsyaan nga adda ditoy Ilocos Norte nga awan ti rumbeng a pagdanagan da gapu ta uray adda ti naimaldit a kaso ti corona virus iti Canada ket nagtalinaed iti qaurantine.
