LAOAG CITY – Inpetteng ni Police Lieutenant Manuel Ordonio, hepe ti PNP Nueva Era nga awan iti napukaw a kuarta ken cellphone a kukua ni Barangay Chairman Donde Bayudan iti Brgy. Santo Niño iti nasao nga ili.
Daytoy ket basar iti imbestigasyon dagiti kameng ti PNP Nueva Era.
Naklaat ni Ordonio kalpasan a nangegan na iti interview ti Bombo Radyo kenni Bayudan mainaig ti nairaman a naitaray wenno natakaw ket ti 15 a ribo a pisos ken cellphone na.
Inbatad na a maysa a pato laeng ti tinakaw dagiti dua a suspek.
Gapu iti daytoy, kalikagum a kasarita da intono bigat ni Bayudan no apay a naibaga na iti Bombo Radyo a natakaw pay ti cellphone ken kuarta na.
Mainaig iti daytoy, inlawlawag ni Ordonio a ti reglamentary period tapno agtalinaed dagiti suspek iti kustodyar da ket 12 nga oras.
Kuna na a ti naiskedyul a panagsasarita da ket ala una ti malem ngem saan a nakaatendar ti kapitan iti laksid nga inuray pay dagiti suspek ngem agarup alas dos ti malem idi mapan ti nasao nga opisyal.
Innayon na nga addan iti PNP ti pato kas ebidensya iti nasao a panagtatakaw
