LAOAG CITY – Natiliw ti maysa nga empleyado iti planta ti softdrinks iti drug buy bust operation iti Brgy. 23 iti ili a San Nicolas.
Nabigbig ti subject ti operasyon a ni Jessie Simon, agtawen ti 39, butler ken residente iti Brgy. Elizabeth iti ili a Dingras.
Daytoy ket kalpasan a nagatang kenni Simon ti maysa a sachet ti maipagarup a shabu nga agbalor ti sangaribo a pisos.
Malaksid iti dayta, nakumpiskar pay iti suspek ti maysa a sachet ti maipagarup a shabu.
Naiget a naglikudan ni Simon dagiti naala a maipawil a droga kenkuana ngem inadmitir na a dati nga agus-sar daytoy iti napalpalabas a tawen.
Inbatad na a ti mangsupsuplay kenkuana ket maysa a taga-Badoc, Ilocos Norte.
Segun kenni P/Major Ryan Retotar, nabayagen a sipsipotan dagiti kameng ti pulisya ti nasao a subject ti operasyon.
Kunana a sakop ti supsuplayan ti suspek ket iti ili a Dingras ken iti San Nicolas.
Naamoan a laraman ni Simon iti DI watchlist.
