LAOAG CITY – Inpakaammo ni Dr. Sherly Agrupis, Presidente iti Mariano Marcos State University (MMSU) iti ciudad ti Batac nga umaboten ti agarop 800 a litro iti inaramid da nga ethyl alcohol ti naibunong da.
Inbatad na a karaman kadagiti binunungan da ket dagiti kapilya, simbaan, ospital, ken LGU’s ditoy probinsya nga Ilocos Norte.
Segun ken ni Agrupis, daytoy a proyekto da a napaulwan ti “Asukal mo, Alcohol mo” ket pinondoan ti Department of Energy, USA ken ti Sugar Regulatory Authority.
Innayon na nga ituloy da ti agibunong intono Lunes, Marso 23 gapu ta adda pay ti walo nga LGUs ditoy probinsya a saan da a naikkan ti inaramid da nga ethyl alcohol.
Nagyaman ni Agrupis gapu ta ti nabayag a sinuksukisok da ket makatulungen kadagiti umili ditoy probinsya.
Maragsakan met ni Agrupis nga iti papanda panagibunong iti inaramid da nga alcohol ket adda pay ni Governor Matthew Marcos-Manotoc ken dinamag na pay no ania pay ti kasapulan da tapno ad-ado ti maaramid da nga ethyl alcohol nga isu ti maysa kadagiti kangrunaan a kasapulan dagiti tattao iti agdama gapu iti covid-19.
