LAOAG CITY – Inlawlawag ni Barangay Chairman Jessie James Bonoan iti Barangay 50, Buttong ditoy ciudad ti Laoag no apay nga agpabpabayad da ti Angkas certificate kadagiti mapan mangala a residente tapno mapalubusan ti panaglubbon iti motorsiklo.
Segun kenni Bonoan, ti addang da ket inbasar da iti Tax Ordinance ti barangay da no sadinno ket mabayadan ti maited a certification.
Ummuna iti daytoy, kuna ni Bonoan nga idi inparuk-at ni Gov. Matthew Marcos Manotoc ti executive order seknan iti panagala ti Angkas Certification ket nangiyuswat da ti sesyon tapno mapagsasaritaan daytoy.
Inpetteng na nga iti executive order ti gobernador ket awan ti nabasa na a maiparit ti panagkolektar ti bayad kadagiti mangala ti Angkas certification ken patyen na nga awan ti malabsing a isut gapo na a nagdesisyon da nga opisyales ti barangay nga agpabayad.
Mainaig iti daytoy, kuna ni Bonoan a ti addang da a panagpabayad ti 100 a pisos manipud iti 25 a pisos ket supsuportaran ti ordinansa a pinutar da idi nakatugawen daytoy a kapitan iti nasao a barangay.
