LAOAG CITY – Inpasingked ni Mrs. Cherry Joy Garma, information officer ti Schools Division of Ilocos Norte (SDOIN) a naiget ti panagsagsagana da iti mapaspasungadan a panaglukat ti klase intuno Agosto 24.
Segun ken ni Garma, addan ti nagbalin a koordinasyon ti SDOIN ken dagiti lokal a gobierno ditoy parobinsya pakairamanan dagiti opisyal ti barangay para iti pannakaiyuswat ti modular learning modality.
Inbatad ni Garma a daytoy ket kalpasan a ti nasao a learning modality ti pinili dagiti estudyante kas wagas ti panagadal da iti baet ti covid-19 pandemic.
Kuna na a babaen iti modular learning ket maited dagiti modules kadagiti barangay officials ken dagitoy ti mangidanon kadagiti estudyante ken isu danto metlaeng ti pakaisublyanan dagiti modules tapno ited da iti pagadalan dagiti estudyante.
Inbunannag ni Garma a kasapulan met ti koordinasyon dagiti nagannak a mangkita wenno mangmonitor kadagiti ubbing bayat ti panagadal da.
Kabayatanna, inabatad pay ni Garma a saan laeng a ti modular ti mabalin nga usaren dagiti agad-adal iti panagbasa nu di ket dagiti nagduduma a learning modalities kas iti online, radyo, ken telebisyon.
Mainaig iti daytoy, inapakaamo na a dagiti klase a maiyuswat iti online ken radyo ket agbayag laeng ti 30 a minutos iti kada subject.
Innayun na a manipod iti Lunes agingga iti Sabado ti schedule ti klase dagiti estudyante.
Kabayatanna, inbaga pay ni Garma nga agtultuloy ti panangiyuswat ti SDOIN iti nagduduma a seminar ken training kadagiti mangisursuro babaen iti online para iti mapaspasungadan a panaglukat ti klase.
Iti agdama, kuna na ngad addan ti 82, 231 a registered learners wenno 94.52 % ti 96, 988 a target ti SDOIN nga agenroll iti school year 2020-2021.
