LAOAG CITY – Nagepekton ti Localized MECQ kas nailanad iti Executive Order no. 123-21 a pinirmaan ni Gov. Matthew Marcos Manotoc kalpasan nga inrekomendar ni Mayor Joefrey Saguid iti ili ti Dingras.
Ummunan nga inbatad ti PNP-Dingras a nakasagana da a mangipatungpal ti localized MECQ.
Segun kenni Police Captain Joseph Calderon, ti chief of police ti PNP-Dingras, sakbay pay nga agepekto daytoy ket naurnos dan ti deployment plan dagiti kameng ti pulisya nga agbantay kadagiti border.
Inbatad na a gapo ta kurang dagiti personnel iti PNP-Dingras ket adda ti maysa a team a na-augment nga agbantay manipud iti INPPPO.
Inlawlawag na a nakikoordernar da kadagiti opisyales ti barangay nangruna kadagiti barangay tanod nga agbantay kadagiti lugar a posible a paglibasan dagiti tattao.
Mainaig iti daytoy, kunana nga adda ti maited kadagiti residente a pass slip a maipakita kadagiti kameng ti pulisya tapno mapalubusan da a rumuar.
Nakaipalaon iti EO a maipawil a rumuar dagiti agtawen ti 15 agpababa ken dagiti agtawen ti 65 agpangato ken ti mapalubusan laeng ket dagiti addaan iti trabaho, maysa a miembro ti pamilya ti mabalin gumatang kadagiti kasapulan ken dagiti aktibidad a mabalin a maipalubos.
Maipatungpal pay ti curfew ken liqour ban manipud alas-nuebe iti rabii agingga iti alas-kuatro ti parbangon.
Saan met a karaman iti curfew dagiti health workers, hospital personnel iti pampubliko ken pribado a pasilidad, opisyal ti barangay kadagiti naapektaran a lugar, dadduma pay nga opisyal, kameng ti PNP, BFP ken dagiti agtrabtrabaho kas frontline COVID-19 service, ken dagiti APOR a kasapulan nga agtrabaho iti ruwar ti ili.
