LAOAG CITY – Inkalintegan ti supplier ti kurong-kurong iti Brgy. Davila iti ili ti Pasuquin nga awan ti nagkuranganda ti pannakaipaay ti produkto a ginatang ti nadakamat a barangay.
Basar iti pannakisarsarita ti Bombo Radyo ti pasdek negosyo a saanen a nagpabigbig pay, in-deliver-da mismo idi Oktubre 11 ti kurong-kurong iti Brgy. Davila kalpasan nga intedda laeng iti purchase order iti maudi a paset ti Setiembre.
Inpakaaamona nga agbalor ti P70,000 ti motor ken iti kurong-kurong ket agbalor ti P29,900 nga addaan ti pakabuklan a balor a P99,900.
Nasdaaw ti supplier no apay nga adda ti kastoy a reklamo kabayatan nga adda pay ti 5 a barangay ti nadakamat nga ili ti naipaayanda ti kapada a lugan nga awan ti reklamoda.
Gapu iti daytoy, kunana nga nangibaon daytoy ti empleadona nga agturong iti nadakamat a barangay tapno alaen ti kurong-kurong ken isubli dagiti papeles.
Kabayatanna, kunana nga iti baet ti nagan ti negosiona ket no kitaen ti certificate of registration ket mabalin da nga aglako to motorsiklo ken dadduma a partes ti behikulo.
Innayonna nga idi pay laeng tawen 2004 a nangrugi a nagbalin a supplier ti gobierno ti negosio ngem ita laeng a naadaan ti kastoy a reklamo.
