LAOAG CITY – Natay ti nakamotorsiklo kalpasan ti panagdinnungparda iti maysa a kurong-kurong iti paset ti barangay road iti Barangay Garreta iti ili ti Badoc.
Segun ken ni P/Cpt. Elison Pasamonte, Hepe ti Badoc Municipal Police Station, ti driver ti motorsiklo ket adda iti umno a tawen, residente iti Barangay Alogoog iti ili ti Badoc ken maysa a construction worker idinto a ti nangiturong ti kurong-kurong ket maysa met a construction worker.
Inbatadna a basar iti inisyal nga imbestigasionda ket kabayatan a dumaldalyasat ti nangiturong ti kurong-kurong nga agturong nga agpa-amianan ket kellaat a nag-U-turn ti driver ti motorsiklo nga agturong met nga agpa-abagatan.
Gapu iti daytoy, kuna ni P/Cpt. Pasamonte a nagdinnungpar ti dua a behikulo ken agpada a nagsagaba dagitoy ti sugat iti nagduduma a paset ti bagida.
Inlawlawagna a gapu iti kinapigsa ti impact ti disgrasia ket naipurwak ti nakamotorsiklo a nangitunda ti pannakaitama ti ulona no sadinno a naitaray iti Mariano Marcos Memorial Hospital and Medical Center iti siudad ti Batac ngem naideklarar a dead on arrival babaen ti attending physician.
Kunana nga iti agdama ket awan pay ti panagsinnarita ti nangiturong ti kurong-kurong ken iti pamilia ti biktima.
Innayonna a saanda pay a masinunuo no nabartek dagiti maseknan a driver idi napasamak ti insidente gapu ta maiyur-uray pay laeng ti resulta ti medikal dagitoy.
