LAOAG CITY – Nangisayangkat ni Civil Defense Deputy Administrator for Operations, Asec. Laurence E. Mina, Regional Director ti Office of Civil Defense ti rehion uno ti taripnong mainaig iti pannakaisadsad ti barko iti kabaybayan iti Barangay La Virgen Milagrosa iti ili ti Badoc.
Segun ken ni P/Cpt. Elison Pasamonte, Hepe ti Badoc Municipal Police Station, karaman kadagiti nakitaripnong ti Philippine Navy, Philippine Coast Guard, Municipal Disaster Risk Reduction and Management Office ken Municipal Social Welfare and Development Office.
Inbatadna a posible nga umabot iti dua agingga tallo a lawas sakbay a naan-anay a maiyaon ti barko kas maibasar iti imbestigasion ti kapitan ti barko.
Inlawlawagna nga ikarkarigatan ti Philippine Coast Guard ken ti grupo ti barko nga ikkaten ti langis tapno maprotektaran ti marine environment kas ti panangikabil ti oil spill boom tapno saan nga agwaras ti langis ken mapaalisto ti pannakaikkat wenno refloating ti barko.
Kunana a nakasagana metten ti pannakaibunong ti relief goods manipud iti national government kadagiti naapektaran iti oil spill.
Innayonna a ti rumrummuar a rason iti pannakaisadsad ti barko ket naaddaan ti problema iti electrical connection a nangitunda ti pannakaiddep ti makina ken naawanan ti kontrol ti kapitan agingga a naisadsad ti barko.
Maipalagip a naisadsad ti barko nga MV MSCI 1 a nangiwayat ti emergency beaching iti kabaybayan iti Barangay La Virgen Milagrosa iti ili ti Badoc.
Inpakaammo ni ENSIGN Aaron Paul Tiangco, Deputy Commander ti Philippine Coast Guard nga adda ti karga ti barko a gravel stones ken adda ti nakalugan a 15 a crew member iti daytoy.
Naammoan nga aggapu ti nasao a barko iti pantalan iti ili ti Currimao nga agturong koma idiay Cagayan.
