LAOAG CITY – Naitabon a dagus ti fetus a nasarakan iti pagbasuraan iti Barangay Caribquib iti ili ti Banna.
Daytoy ti kinumpirmaran ni Police Staff Sergeant Jimmy Hufancia, imbestigador iti PNP iti ili ti Banna.
Inbaga na a ti fetus ket napanaganan ti “Baby Anthony” ken namisaan iti St. Roche Parish iti Brgy. Lorenzo iti nasao nga ili sakbay a naitabon iti Roman Catholic Cemetery.
Ti pannakaitabon ni “Baby Anthony” ket inatendaran dagiti sumagmamano nga opisyal iti ili ti Banna nga indaulwan da Mayor Hon. Carlito A. Abadilla II ken Vice Mayor Hon. Mary Chrislyn C. Abadilla.
Immunan nga inbaga ti PNP-Banna a nagreport kadakuada ti agnagan ti Michael Felipe kalpasan a nakita na ti nakasupot a fetus a mapatta-patta nga innem a bolanen iti pagbasuraan iti Sitio Saranay iti nasao a barangay.
Agtultuloy ti imbestigasyon ti PNP-Banna tapno maamoan no siasinno ti ina ken nangibelleng iti fetus iti nadakamat a lugar.
