LAOAG CITY – Rinugyanen ti Department of Education (DepEd) ti agibunong kadagiti modules dagiti estudyante ditoy ciudad ti Laoag, dua a lawas sakbay a mangrugi ti klase para iti 2021-2022.
Daytoy ti inbatad ni Mrs. Vilma Eda, Schools Division Supt. ditoy ciudad ti Laoag.
Inlawlawag na a nakikoordinar dan kadagiti opisyal ti barangay para iti pannakaibunong dagiti modules dagiti estudyante ditoy ciudad.
Nagyaman ni Eda kadagiti opisyal ti barangay gapu ta no awan dagitoy ket saanda a kabaelan nga ibunong amin dagiti modules kadagiti estudyante.
Inbilin pay ni Eda nga iti baet a nasapsapa ti pannakaibunong dagiti modules ket saan pay laeng nga iggaman dagiti ubbing kasta met dagiti nagannak, ken maipan pay laeng iti box nga inaramid da iti balayda.
Innayon na a gagem daytoy ket no bilang adda man ti virus dagiti modules ket saan a basta makaptan dagiti pakaibunungan na nga estudyante.
Iti agdama, inpakaammo ni Eda nga adda pay ti tallo ribo nga estudyante ditoy ciudad ti Laoag a saan pay a nakaenroll.
