LAOAG CITY – Inadmitir ni Provincial Health Officer Dr. Josephine Ruedas nga adda pay laeng dagiti sumagmamano nga umili ti agpili ti bakuna kontra iti covid-19 a maitudok kadakuada.
Inlawlawagna a daytoy ti makitkitana a rason no apay a narigat a magun-od ti herd immunity ditoy Ilocos Norte.
Inbatadna a naobserbaran na pay kadagiti dadduma a Local Government Units nga umab-abot laeng ti tallo gasut, dua gasut ken no dadduma ket awan pay ti mapan iti vaccination area gapu ta saanda a kayat ti brand ti bakuna a maus-usar iti vaccination roll-out.
Nupay kasta, kunana a kalikagumda a mabakunaan ti innem a ribu nga umili iti inaldaw gapu ta napinpintas met laeng ti panangrambak ti paskua no ad-adu dagiti nabakunaan kontra iti COVID-19.
Innayonna nga agpapada ti epekto dagiti amin a klase ti bakuna gapu ta makaited dagitoy ti nataltalged a salun-at.
Kabayatanna, basar iti kaudian a datos nga inparuk-at ti Gobierno Probinsial ket agingga idi Oktubre 20, 2021 addan ti 366,885 a residente ditoy probinsya ti nabakunaanen kontra iti covid-19 ken 35 pay laeng porsiento ti nagun-od para iti herd immunity.
