LAOAG CITY – Inbatad ni Mr. Domingo Garcia, Public Market supervisor iti ciudad ti Batac nga adda ti sursuruten da a proseso iti panagipwesto da kadagiti aglaklako iti tiendaan iti nasao a ciudad.
Sungbat daytoy ni Garcia iti kalikagom ni Mrs. Mercedes Lacambra, maysa a market vendor iti merkado publiko iti siudad ti Batac a maiyakar ti paglaklakoan ti nakariri na a pada na a market vendor a ni Edlyn Real.
Segun ken ni Garcia, no adda ti bakante a pwesto a paupaan da ket ikkan da ti billboard no sadinno nga mangipaay da ti 10 nga aldaw sakbay nga agawat da kadagiti agaplikar.
Kuna na a no maymaysa ti agaplikar ket otomatiko nga ited da ti bakante a pwesto ngem no nasursurok ngem dua ket agbibinnunot dagiti maseknan.
Innayon ni Garcia nga uray kayat da nga iyakar ni Real ket awan ti mabalin a pangipanan da.
Inpalgak pay ni Garcia a nabayagen nga agtitipon dagiti wholesaler wenno retailer iti nasao a tiendaan ngem awan dagiti nagririri malaksid kada Lacambra ken Real.
Immunan nga inbaga ni Garcia a ti damo a reklamo a naidanun kenkuana ket ti panagipukpukkaw ti presyo dagiti aglaklako no sadinno nga adda ti nalaklaka ti panaglako na.
Inpakaammo na nga inaksyunan na a dagus daytoy babaen iti pannakisarita na kadagiti maseknan.
Naurnus ti nasao a problema ngem naamoan ni Garcia a kalpasan iti daytoy ket nagaramid ti surat ni Lacambra ken pinapermaan na kadagiti pada na nga aglaklako.
Rumrumuar a nailanad iti surat ti panangkwes-kwestyunar ni Lacambra no kasanu ti panangiplastar da ken ni Real ken ti nalaka unay a presyo dagiti lakona.
Naamoan met daytoy ni Real ket nakapungtot rason a napan na dinarop ni Lacambra.
Basar ken ni Garcia, pinagsina na a kinasarita dagiti dua ken inbaga na nga agsasango da a tallo tapno masolbar ti susik iti nagbaetan da ngem saan a napan nagpakita ni Lacambra.
