LAOAG CITY – Kinumpirmaran ni Police Lt. Rudy James Jacalne, ti chief of police ti PNP-Piddig ti pannakatiliw dagiti dua a lallaki gapo iti panagsusugal partikular iti billiard iti Sitio Atibong, Brgy. 1, Cabaroan iti nasao nga ili.
Dagiti natiliw ket maysa nga agtawen ti 36, naasawaan, negosyante ken residente iti Brgy. 20 Calluza, Piddig ken ti agtawen ti 57, awanan ti asawan, awanan ti trabaho ken residente iti Barangay 1, Cabaroan iti nasao met laeng nga ili.
Segun kenni Jacalne, adda ti timmawag kadakuada a concern citizen nga adda ti agsusugal ken in-validate da daytoy.
Kunana nga iti panagresponde da ket naaktuan da dagiti suspek nga agsusugal ngem sumagmamano kadagitoy ket nakataray ken dagiti laeng dua a mismo a player ti nagammatan da.
Inbatad pay ni Jacalne a ti agtagikua iti bilyaran ket masikog ken gapo iti amak na nga adda ti madi a mapasamak iti daytoy wenno humanitarian reason, kinasarita na lattan ti maseknan nga alaen da ti billiard set tapno agserbi nga ebidensya.
Nakumpiskar iti lugar ti maysa a billiard table nga addaan ti kumpleto a billiard balls, dua a cue sticks, maysa a cue stick bridge, maysa a billiard ball triangle ken ti pusta nga umabot iti 17,200 a pisos.
Mainaig iti daytoy, kuna ni Jacalne nga adda ti business permit ti agtagikua iti billiard ngem maus-usar metten a pagsusugalan.
Kabayatanna, naipila metten iti piskalya ti kaso a sangwen dagiti dua babaen iti inquest proceeding.
Iti sabali a bangir, kuna ni Jacalne nga iti napalabas nga aldaw ket adda ti uppat a natiliw da nga agsusugal babaen iti panagay-ayam da ti lucky-9.
