LAOAG CITY – Inlawlawag ni Ms. Marilyn Vergara, Chief Statistician iti PSA ditoy probinsya a ti rason a maibayag ti pannakaiparuk-at ti national ID ket gapo kadagiti nagdoble a nagparehistro.
Segun kenni Vergara, masapol a ma-screen a nalaing dagiti nagparehistro tapno awan ti agbalin a problema.
Inbatad na a saan laeng a ti PSA ti maseknan nga ahensya gapo ta karaman pay ti central bank.
Inpalgak na a no malpas ti panagparehistro, ti database ket maisubmitir iti central bank gapo ta daytoy ti agaramid ti ID ken maipan iti PHILpost nga isu ti agibunong kadagiti nagparehistro.
Kunana a gapo ta saan met unay nga ado ti empleado ti central bank ken PHIlpost, adda latta ti gundaway nga adda ti backlog gapo ta masapol a matingiting a nalaing amin dagiti nagrehistro.
Mainaig iti daytoy, inbatad na nga umabot metten ti 15 a milyon nga ID ti naited kadagiti nagparehistro iti intero a Pilipinas.
Kabayatanna, immapela ni Vergara iti publiko nga aganus nga aguray iti National ID.
