LAOAG CITY – Nagpakamatay ti maysa a lalaki, agtawen ti 38, construction worker iti Brgy. Darayday ditoy Siudad ti Laoag.
Segun iti kasinsin ti biktima, apaman nga agturong iti kataltalonan ti ikit daytoy tapno agiwayway ti tarakenda a baka ket dita a nakita na ti biktima a nakabitinen ito puon ti kayo ti mangga.
Inbatadna a gapu iti daytoy ket nagal-alisto a nagpaarayat.
Inlawlawagna nga adda ti bangkito iti lugar a nakapasamakan ti insidente ken isu ti posible a nagbatayan ti biktima iti panagbekkelna ken adda ti nylon a tali nga isu met ti naaramat ken naipulipol iti tengngedna.
Kunana a mabalin nga adda uppat nga oras ti napalabas sakbay a naduktalanda a nagbekkel ti biktima gapu ta agarup pasado alas kuatro ti bigat ket adda pay laeng ti nakakita iti biktima nga agturong iti kataltalonan.
Inpalgakna a saanda met nga inpagarup a maaramid ti biktima nga agbekkel gapu ta awan met ti pakalasinan nga adda ti planona nga agaramid ti saan a napintas.
Mainaig iti daytoy, inpakaammona a ti rumrumuar a rason ti panagbekkel ti biktima ket gapu iti problema ti pamilya ken possible a saanna a kinabaelan.
Agpapan a maisursurat ti damag ket agtultuloy pay laeng ti panangduktal dagiti imbestigador ti Philippine National Police ditoy Siudad ti Laoag no ania ti makaigapu iti nasao a pasamak.
Kabayatanna, natay ti maysa a babai ditoy ciudad ti Laoag kalpasan a nagbekkel partikular iti uneg ti comfort room da.
Segun kenni Police Lt. Col. Joemar Labiano, ti chief of police ti PNP-Laoag, ti biktima ket addaan ti sakit ken daytoy ti rumrumuar a rason ti panagbekkel na.
Inbatad na a nakita a mismo ti kapamilya ti biktima ngem daytoy ket kalpasan pay laeng ti agarop 12 nga oras.
Inlawlawag na nga iti imbestigasyon da ket awan met ti ummunan a pananggandat ti biktima a panagpakamatay.
