LAOAG CITY – Kinumpirmaran ni Police Major Eduardo Santos, ti chief of police ti PNP-Badoc nga addan ti person of interest iti pannakapalto-paltog a puon ti nakatayan ni Jose Joy Pillo, maysa a seaman, tubo iti Iloilo ken residente iti Barangay Pasoc iti nasao nga ili.
Segun kenni Santos, adda dagiti nakakita iti mismo a rupa dagiti suspek a maibilang a gun for hire.
Inlawlawag na a basar iti panagimbestigar da, manipud pay iti pagtaengan ti biktima iti Barangay Pasoc ket maipagarop a sinuroten dagiti suspek agingga a nakaala da ti gundaway a nangpapatay daytoy partikular iti sango ti tiendaan iti paset ti Barangay Garreta iti nasao nga ili.
Malaksid iti daytoy, kuna ni Santos a dua a motibo wenno anggulo ti ad-adalen da iti agdama a rason ti pammaltog kas iti love triangle ken old grudge wenno datin a susik.
Nupay kasta, nagkedked metten a mangipaay ti naan-anay a detalye ni Santos tapno saan a maapektaran ti ius-uswat da nga imbestigasyon.
Maipalagip nga idi bigat kalman, napalto-paltogan a nakasugatan ti barukong ken timid a puon ti pannakatay ti biktima.
Kabayatanna, agtultuloy pay laeng ti naun-uneg nga imbestigasyon ti PNP ken mangnamnama daytoy a maipila ti kaso kontra kadagiti suspek iti kabiitan a panawen.
